काठमाडौं । वरिष्ठ कलाकार मदनकृष्ण श्रेष्ठको जीवनमा आधारित चलचित्र ‘म मदनकृष्ण’को छायांकन सुरु भएको छ। शुभमुहूर्त गर्दै आजदेखि चलचित्रको छायांकन सुरु गरिएको हो ।
चलचित्रको छायांकन काठमाडौं, पाँचखाल र पनौतीमा गरिनेछ। निर्माण पक्षले चलचित्रको प्रदर्शन मितिसमेत घोषणा गर्दै चैत ४ गतेदेखि नेपालभर प्रदर्शनमा ल्याउने जनाएको छ ।
निर्देशक मिलन चाम्सले मदनकृष्ण श्रेष्ठको संघर्ष, सफलता र जीवनका विभिन्न आरोह–अवरोहलाई समेटेर चलचित्र निर्माण गरिने बताएका छन् । चलचित्रमा मदनकृष्ण श्रेष्ठको भूमिकामा महेश त्रिपाठी देखिनेछन् भने उनकी श्रीमती यशोदाको भूमिका केकी अधिकारीले निर्वाह गर्नेछिन् । अरुण क्षेत्रीले हरिवंश आचार्य र वर्षा राउतले हरिवंशकी श्रीमतीको भूमिका निर्वाह गर्नेछन् ।
चलचित्रमा मदनकृष्णको बाल्यकाल, सरकारी जागिरे जीवन, हरिवंश आचार्यसँगको सहकार्य तथा अन्तरजातीय विवाहलगायत जीवनका महत्वपूर्ण घटनालाई समेटिनेछ । चलचित्रमा राजाराम पौडेल, किरण केसी, रमेश बुढाथोकी, विनोद न्यौपाने, रुषा न्यौपाने, यमन श्रेष्ठ, देशभक्त खनाल, दिनेश डिसीलगायत कलाकारको पनि अभिनय रहनेछ ।
भिन्टेज मोसन पिक्चर्सको प्रस्तुतिमा बन्ने चलचित्रलाई राजकुमार श्रेष्ठले निर्माण गर्नेछन् । काठमाडौं उपत्यकामा रिच इन्टरटेनमेन्ट तथा उपत्यकाबाहिर आरआर फिल्म्सले चलचित्र वितरण गर्नेछ ।
