काठमाडौँ । रसुवाको भोटेकोशी नदीमा आएको भीषण बाढीका कारण चलचित्र ‘बा : एक योद्धा’को प्रदर्शन स्थगित गरिएको छ ।
निर्माण पक्षले एक विज्ञप्ति जारी गर्दै गत भदौ १० गते आएको बाढीबाट भएको अकल्पनीय जनधनको क्षतिप्रति दुःख व्यक्त गर्दै देशको एक भूगोल विपत्तिमा परेका बेला सामाजिक तथा पारिवारिक कथावस्तुमा आधारित चलचित्र प्रदर्शन गर्नु उपयुक्त नहुने निष्कर्ष निकाल्दै चलचित्रको प्रदर्शन स्थगित गरिएको निर्माण पक्षले जनाएको छ ।
यसअघि आगामी भदौ १९ गतेदेखि देशभर प्रदर्शन गर्ने तयारी गरिएको चलचित्र अब मंसिर २४ गते बिहीबारदेखि प्रदर्शनमा आउने भएको छ । प्रदर्शन मिति परिवर्तनबाट दर्शक, चलचित्र प्रदर्शक, वितरक तथा सञ्चारकर्मीमा पर्न गएको असुविधाप्रति निर्माण पक्षले क्षमा मागेको छ ।
यसैबीच, ‘बा : एक योद्धा’ परिवारका तर्फबाट २ लाख १ हजार रुपैयाँ प्रधानमन्त्री दैवी प्रकोप उद्धार कोषमा जम्मा गरिएको निर्माण पक्षले जनाएको छ ।
राष्ट्र शोकमा रहेका बेला सबै नेपालीलाई आफ्नो तर्फबाट राहत तथा उद्धार कार्यमा सहयोग गर्न निर्माण पक्षले आग्रहसमेत गरेको छ ।
