काठमाडौँ । भारतको महाराष्ट्र खाद्य तथा औषधि प्रशासनले बलिवुड अभिनेता शाहरुख खान, अजय देवगन र टाइगर श्राफलाई कारण देखाऊ नोटिस पठाएको छ ।
प्रतिबन्धित विमल पान मसालाको अप्रत्यक्ष प्रचार हुने गरी विमल इलायचीको विज्ञापनमा सहभागी भएको आरोप लगाउँदै प्रशासनले १५ दिनभित्र स्पष्टीकरण मागेको भारतीय मिडियाहरुले उल्लेख गरेका छन् ।
समाचार संस्था पीटीआईका अनुसार तीनै जनालाई गत ११ अगस्टमा नोटिस पठाइएको हो । प्रशासनले विज्ञापनमा प्रयोग गरिएको ‘विमल’ नाम, उत्पादन र संवादबाट पान मसालाको प्रचार भएको देखिएको जनाएको छ ।
महाराष्ट्रमा सुर्ती तथा निकोटिनयुक्त गुटखा र पान मसालामाथि सन् २०१२ देखि प्रतिबन्ध छ । पछिल्लो पटक गत १३ जुलाईदेखि थप एक वर्षका लागि यसको उत्पादन, भण्डारण, ओसारपसार र बिक्रीमा प्रतिबन्ध लगाइएको छ ।
प्रशासनका अनुसार गत २५ मेदेखि ३१ जुलाईसम्म प्रतिबन्धित गुटखा तथा पान मसालाविरुद्ध ६५८ स्थानमा छापा मारिएको थियो । त्यस क्रममा १५ करोड ११ लाख रुपैयाँभन्दा बढीको सामग्री बरामद, ५१९ मुद्दा दर्ता र ७०१ जना पक्राउ परेका छन् । सामग्री ओसारपसारमा प्रयोग भएका ७८ सवारीसाधन पनि नियन्त्रणमा लिइएका छन् ।
विमल इलायचीको विज्ञापन यसअघि पनि विवादमा परेको थियो । सन् २०१८ मा स्वास्थ्य सेवा महानिर्देशनालयले कम्पनीलाई नोटिस पठाएको थियो भने सन् २०२४ मा दिल्ली उच्च अदालतले सुर्तीविहीन उत्पादनको विज्ञापनसम्बन्धी कम्पनीको पक्षमा फैसला गरेको थियो ।
