काठमाडौं । भारतीय चलचित्र ‘रामायण: भाग एक’ को अग्रिम टिकट बिक्री एक लाख नाघेको छ । रणवीर कपुर र यशको मुख्य भूमिका रहेको यो चलचित्र नोभेम्बर ५ मा विश्वभर प्रदर्शन हुँदैछ । प्रदर्शन हुन १२ दिन बाँकी रहँदा चलचित्रले भारतका प्रमुख चलचित्रघरका सञ्जालमा एक लाखभन्दा बढी टिकट बिक्री गरेको हो ।
घरेलु बक्स अफिसमा अक्टोबर २५ सम्म चलचित्रका कुल १ लाख ७ हजार ५६२ टिकट बिक्री भएका छन् । तीमध्ये पिभिआर आइएनओएक्सबाट ९६ हजार ६४५ र सिनेपोलिसबाट १० हजार ९१७ टिकट बिक्री भएको विवरणमा उल्लेख छ। विशेषगरी आइम्याक्स प्रदर्शनका लागि टिकटको माग राम्रो देखिएको छ ।
चलचित्रको अग्रिम टिकट बिक्री प्रदर्शन मिति नजिकिँदै जाँदा अझ बढ्ने अपेक्षा गरिएको छ । निर्माण पक्षका लागि प्रमुख चलचित्रघरका सञ्जालमा पाँच लाख टिकट बिक्री गर्ने लक्ष्य रहेको बताइएको छ । तर दीपावलीअघि चलचित्र प्रदर्शन हुन लागेकाले उक्त लक्ष्य हासिल गर्न चुनौती हुन सक्ने अनुमान गरिएको छ ।
चलचित्रका केही आइम्याक्स प्रदर्शनमा टिकटको मूल्य दुई हजार भारतीय रुपैयाँभन्दा माथि पुगेको छ । महँगो मूल्यका बाबजुद ती स्थानमा पनि टिकट बिक्री भइरहेको जनाइएको छ । अक्टोबर २८ देखि प्रदर्शनअघिका अन्तिम आठ दिन सुरु हुने भएकाले अग्रिम टिकट बिक्रीले थप गति लिने अपेक्षा गरिएको छ । चलचित्रले प्रदर्शनको पहिलो दिन ७० करोड भारतीय रुपैयाँभन्दा बढी कमाइ गर्ने लक्ष्य राखेको बताइएको छ । दीपावलीअघिको समयलाई ध्यानमा राख्दा ६० करोड रुपैयाँको सुरुआती कमाइ पनि राम्रो मानिने विश्लेषण गरिएको छ । अग्रिम टिकट बिक्रीले गति लिन थालेसँगै ‘रामायण’ले प्रदर्शनपछि भारतीय चलचित्र बजारमा कस्तो प्रभाव पार्छ भन्ने चासो बढेको छ ।
नितेश तिवारीको निर्देशनमा बनेको ‘रामायण’ महर्षि वाल्मीकि रचित महाकाव्यमा आधारित दुई भागको चलचित्र हो । रणवीर कपुरले भगवान् राम, यशले रावण र साई पल्लवीले सीताको भूमिका निर्वाह गरेका छन्। चलचित्रमा सनी देओल, रवि दुबे, अरुण गोविल, लारा दत्ता, रकुल प्रीत सिंह, विवेक ओबेरोय र कुणाल कपुरलगायत कलाकारको पनि अभिनय रहेको छ । यसको दोस्रो भाग सन् २०२७ को दीपावलीमा प्रदर्शन गर्ने तयारी गरिएको छ ।
