दाङ । भारीदेखि अति भारी वर्षाको सम्भावनालाई मध्यनजर गर्दै दाङका विभिन्न पाँच सडकखण्डमा रातिको समयमा सवारी आवागमन बन्द गरिने भएको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरण र मौसम विज्ञान विभागका अनुसार असोज ८ देखि ११ गतेसम्म दाङसहित देशका धेरै भूभागमा भारीदेखि अति भारी वर्षाको सम्भावना रहेकाले असोज ८ गतेदेखि हरेक दिन बेलुका ५ बजेदेखि बिहान ६ बजेसम्म सडक बन्द गरिने भएको हो ।
बन्द हुने सडकखण्डहरूमा राप्ती राजमार्गअन्तर्गत तुलसीपुर–कपुरकोट, भालुवाङ–चकचके सडकको भालुवाङदेखि गनाहा खोलासम्म, सहिद मार्गअन्तर्गत घोराही–होलेरी, घोराही–मुर्कुटी र तुलसीपुर–सुर्खेत सडकअन्तर्गत तुलसीपुरदेखि कालिमाटीसम्म रहेका छन् ।
