काठमाडौँ । आकर्षक तलबको प्रलोभन देखाउँदै विभिन्न देशमा वैदेशिक रोजगारीमा पठाइदिने भन्दै रकम ठगी गरेको आरोपमा प्रहरीले तीन जनालाई पक्राउ गरेको छ ।
पक्राउ पर्नेमा तेह्रथुमका ३५ वर्षीय नगेन्द्र भेटवाल, बर्दियाका ४४ वर्षीय समुन्द्रबहादुर थापा र पाँचथरका ४४ वर्षीय कुमार खतिवडा रहेका छन् ।
प्रहरीका अनुसार नगेन्द्रले जापान पठाइदिने भन्दै एक जनाबाट १० लाख रुपैयाँ, समुन्द्रले कम्बोडिया पठाइदिने भन्दै ७ लाख रुपैयाँ र कुमारले संयुक्त अरब इमिरेट्स पठाइदिने भन्दै एक जनाबाट १ लाख रुपैयाँ लिएर सम्पर्कविहीन भएका थिए ।
पीडितको उजुरीका आधारमा काठमाडौँ उपत्यका अपराध अनुसन्धान कार्यालय टेकुबाट खटिएको प्रहरीले नगेन्द्रलाई सोमबार टोखा–५ बाट तथा समुन्द्रलाई कागेश्वरी मनोहरा–९ र कुमारलाई कागेश्वरी मनोहरा–७ बाट पक्राउ गरेको हो ।
पक्राउ परेका तीनै जनालाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ ।
