सञ्जय मिश्रा
रौतहट, २३ भदौ
रौतहटको फतुवा विजयपुर नगरपालिका–८ स्थित श्मशानघाटमा एक स्थानीय परिवारले पिताको स्मृतिमा निजी लगानीमा आवश्यक भौतिक संरचना निर्माण गरी समुदायलाई हस्तान्तरण गरेको छ।
फतुवा विजयपुर नगरपालिका–८ निवासी स्वर्गीय कर्णबहादुर क्षेत्रीको स्मृतिमा उहाँका ज्येष्ठ सुपुत्र सुरेशकुमार लामिछानेले आफ्नै निजी लगानीमा लाखौँ रुपैयाँ खर्चेर शवदाह गृह, व्यवस्थित चिता, घामपानीबाट ओत लाग्ने प्रतीक्षालय तथा प्रवेशद्वार निर्माण गराउनुभएको हो।
निर्माण कार्य सम्पन्न भएसँगै मङ्गलबार आयोजित एक समारोहका बिच उक्त संरचना औपचारिक रूपमा स्थानीय समुदायलाई हस्तान्तरण गरिएको छ।
हस्तान्तरण कार्यक्रममा स्थानीय जनप्रतिनिधि, समाजसेवी, विभिन्न राजनीतिक दलका प्रतिनिधि तथा लामिछाने दम्पतीको उपस्थिति थियो। सो अवसरमा सहभागीहरूले स्वर्गीय पिताको सम्झनामा व्यक्तिगत खर्चबाट सार्वजनिक प्रयोजनका लागि यस्ता महत्त्वपूर्ण संरचना निर्माण गर्नु प्रशंसनीय र अनुकरणीय कार्य भएको बताएका छन्।
पितृप्रतिको सम्मानसँगै सामाजिक दायित्व
सामान्यतया दिवङ्गत आफन्तको सम्झनामा धार्मिक तथा पारिवारिक पूजापाठ गर्ने प्रचलन रहे पनि लामिछानेले त्यसलाई सामाजिक सेवासँग जोड्दै समुदायका लागि दीर्घकालीन उपयोग हुने संरचना निर्माण गर्नुभएको हो।
स्थानीय बासिन्दाका अनुसार श्मशानघाटमा व्यवस्थित चिता, ओत लाग्ने प्रतीक्षालय र सुरक्षित प्रवेशद्वारको आवश्यकता लामो समयदेखि खड्किँदै आएको थियो। विशेषगरी वर्षायाममा शवदाह गर्न आउने आफन्तलाई घामपानीबाट जोगिन ठुलो सास्ती हुने गरेकोमा यी संरचना बनेपछि निकै सहज हुने स्थानीयको भनाइ छ।
’व्यक्तिगत शोकलाई सामाजिक सेवामा रूपान्तरण’
स्थानीयहरूले लामिछानेको यस कार्यलाई केवल पितृस्मृतिमा सीमित नराखी, व्यक्तिगत शोकलाई सामाजिक सेवामा रूपान्तरण गर्ने उदाहरणीय कदमका रूपमा लिएका छन्।
स्वर्गीय कर्णबहादुर क्षेत्रीको स्मृतिमा निर्मित संरचना अब समुदायका सबैका लागि साझा सम्पत्तिका रूपमा उपयोग हुनेछ। यसले एउटा परिवारको पितृप्रतिको सम्मानलाई सम्पूर्ण समुदायको हितसँग जोडेको छ।
स्थानीय समाजसेवी तथा जनप्रतिनिधिहरूले यस्ता कार्यले समाजमा सकारात्मक सन्देश प्रवाह गर्ने र सार्वजनिक आवश्यकताका क्षेत्रमा व्यक्तिगत लगानी हुँदा स्थानीय तहको स्रोतमा पर्ने दबाबसमेत कम हुने धारणा राखेका छन्।
कार्यक्रममा सहभागीहरूले स्वर्गीय क्षेत्रीप्रति श्रद्धाञ्जली अर्पण गर्दै उहाँको आत्माको चिरशान्तिको कामना गर्नुका साथै सामाजिक उत्तरदायित्व निर्वाह गरेको भन्दै सुरेशकुमार लामिछाने तथा उहाँको परिवारप्रति हार्दिक आभार व्यक्त गरेका छन्।
