काठमाडौं, १८ भदौ । भूमि व्यवस्था, सहकारी तथा गरिबी निवारण मन्त्रालय अन्तर्गतको भूमि समस्या समाधान समितिले काठमाडौं महानगरपालिकाभित्रका भूमिहीन र अव्यवस्थित बसोबासीलाई जग्गा प्राप्तिका लागि निवेदन दिन आह्वान गरेको छ। समितिले बिहीबार सूचना जारी गर्दै ३५ दिनभित्र निवेदन पेस गर्न आग्रह गरेको हो।
सूचना अनुसार काठमाडौं महानगरपालिकाभित्र बसोबास गरिरहेका भूमिहीन दलित, भूमिहीन सुकुम्वासी तथा अव्यवस्थित बसोबासीले तोकिएको ढाँचामा फाराम भरेर आफू हाल बसोबास गरिरहेको सम्बन्धित वडा कार्यालयमार्फत निवेदन पेस गर्नुपर्नेछ।
तोकिएको समयसीमाभित्र निवेदन नदिने व्यक्तिहरूलाई पछि प्रक्रियामा समावेश गराउन कठिन हुने मन्त्रालयले जनाएको छ।
