सञ्जय मिश्रा
रौतहट, ५ भदौ। जिल्ला प्रहरी कार्यालय रौतहटले साउन महिनामा अपराध अनुसन्धानदेखि सीमा सुरक्षा, ट्राफिक व्यवस्थापन, लागुऔषध नियन्त्रण र जनचेतनामूलक कार्यक्रमसम्मको आफ्नो मासिक प्रगति विवरण सार्वजनिक गरेको छ।सार्वजनिक तथ्यांकले जिल्लामा अपराध नियन्त्रणसँगै फैसला कार्यान्वयन र सीमा क्षेत्रमा हुने अवैध गतिविधिमाथि प्रहरीको निगरानी बढेको देखाएको छ।
जिल्ला प्रहरी कार्यालय रौतहटका प्रवक्ता डिएसपी बसन्त गौतमले प्रेस विज्ञप्तिमार्फत साउन महिनाको उपलब्धि सार्वजनिक गरेका हुन्। साउन महिनामा रौतहटमा विभिन्न प्रकृतिका ८९ वटा मुद्दा दर्ता भएका छन्। तथ्यांकअनुसार सामाजिक अपराधका मुद्दा सबैभन्दा बढी २५ वटा छन्।
त्यस्तै संगठित तथा आर्थिक अपराध १६, ज्यानसम्बन्धी १२, महिला तथा बालबालिकासम्बन्धी अपराध ११, आत्महत्या ५, चोरी ५, सवारी ज्यान ३ र अन्य प्रकृतिका १२ वटा मुद्दा दर्ता भएका छन्। यस तथ्यांकले रौतहटमा परम्परागत आपराधिक घटनासँगै सामाजिक तथा आर्थिक प्रकृतिका अपराध पनि प्रहरीका लागि प्रमुख चुनौतीका रूपमा रहेको संकेत गर्छ।
जघन्य तथा गम्भीर अपराधतर्फ कर्तव्य ज्यानका २, बैंकिङ कसुरका १२ र ठगीका ३ गरी १७ वटा मुद्दा दायर गरिएको प्रहरीले जनाएको छ। चालु मुद्दामा फरार रहेका ६८ जना प्रतिवादी पक्राउ परेका छन्। त्यस्तै फैसला कार्यान्वयनतर्फ ३४ जना पक्राउ गरी उनीहरूबाट १३ वर्ष ८ महिना ७ दिन कैद तथा १५ हजार ८१० रुपैयाँ जरिवाना असुल गरिएको छ। फैसला भइसकेका मुद्दाका प्रतिवादी पक्राउ पर्नुले अदालतको फैसला कार्यान्वयनमा प्रहरी सक्रिय रहेको देखाउँछ।
प्रहरीका अनुसार साउन महिनामा कुल ५१८ वटा ठाडो उजुरी परेका थिए। तीमध्ये ४९५ वटा फर्छ्योट गरिएको छ भने ४३ वटा उजुरी प्रक्रियामा रहेका छन्। जिल्ला प्रहरी कार्यालयमा ४२६ र जिल्ला प्रशासन कार्यालयमार्फत ११२ वटा उजुरी प्राप्त भएको प्रहरीले जनाएको छ।
एसपी सिताराम रिजालको निर्देशनमा प्रहरी टोलीले भारतबाट भन्सार छली नेपाल भित्र्याइएको ६ लाख १४ हजार १८० रुपैयाँ बराबरको सामान बरामद गरेको छ। तस्करीमा प्रयोग भएको एक थान सवारी साधनसमेत नियन्त्रणमा लिएर बरामद सामान तथा सवारी साधन जिल्ला भन्सार कार्यालय गौरमा बुझाइएको प्रहरीले जनाएको छ।
यसै अवधिमा २६७ लिटर अवैध मदिरा बरामद गरी नष्ट गरिएको छ। सीमा क्षेत्रबाट हुने अवैध कारोबार नियन्त्रण प्रहरीको नियमित प्राथमिकतामा रहेको तथ्यांकले देखाउँछ। लागुऔषध नियन्त्रणतर्फ प्रहरीले ७०० ग्राम गाँजासहित एक जनालाई पक्राउ गरी मुद्दा दायर गरेको छ। लागुऔषधको कारोबार तथा ओसारपसार नियन्त्रणका लागि प्रहरीले निगरानी र कारबाहीलाई निरन्तरता दिएको जनाएको छ।
नदीजन्य पदार्थको अवैध उत्खनन तथा नदी दोहन नियन्त्रणतर्फ प्रहरीले १० वटा ट्याक्टर नियन्त्रणमा लिएको छ। कारबाहीबाट ३९ हजार रुपैयाँ राजस्व संकलन भएको छ। त्यस्तै अवैध सालको काठसहित साइकल बरामद गरी ५० हजार रुपैयाँ राजस्व संकलन गरिएको छ।
साउन महिनामा रौतहटमा ६८ वटा सवारी दुर्घटना भएका छन्। दुर्घटनामा परी ४ जनाको मृत्यु भएको छ भने ११६ जना घाइते भएका छन्। ट्राफिक नियम उल्लंघनलगायत कसुरमा ७२१ जनामाथि कारबाही गरी ८ लाख १८ हजार ५०० रुपैयाँ राजस्व संकलन गरिएको जिल्ला ट्राफिक प्रहरी प्रमुख इन्स्पेक्टर राजेन्द्र थापा मगरले बताएका छन्।
दुर्घटनाको संख्या र घाइतेको तथ्यांकले रौतहटमा सडक सुरक्षा तथा ट्राफिक अनुशासन अझै चुनौतीपूर्ण रहेको देखाउँछ। प्रहरीले विभिन्न स्थानबाट हराएका २४ थान मोबाइल फोन बरामद गरी सम्बन्धित धनीलाई बुझाएको जनाएको छ।
समुदाय तथा विद्यालय केन्द्रित ७५ वटा जनचेतनामूलक कार्यक्रम सञ्चालन गरिएको छ। कार्यक्रममा १ हजार ३५५ जना लाभान्वित भएका छन् भने १५० जना प्रहरी जनशक्ति परिचालन गरिएको छ। अल्पसंख्यक लक्षित वर्गका लागि समेत एक कार्यक्रम सञ्चालन गरिएको प्रहरीले जनाएको छ।
सुरक्षा व्यवस्थापन र अपराध नियन्त्रणका लागि साउन महिनामा प्रहरीले व्यापक रूपमा जनशक्ति परिचालन गरेको छ। प्रहरीका अनुसार मोबाइल गस्ती ६४८, पैदल गस्ती ९२६, एलआरपी ५, एसआरपी २ हजार ७९६, चेकिङ ३१० र पिकेट ९३० पटक सञ्चालन गरिएको छ।
विभिन्न जिम्मेवारीमा गरी कुल ६ हजार ५४१ ड्युटी सञ्चालन गर्दा १३ हजार ७१८ जना प्रहरी जनशक्ति परिचालन गरिएको जिल्ला प्रहरी कार्यालय रौतहटले जनाएको छ।
समग्रमा साउन महिनाको प्रहरी तथ्यांक हेर्दा रौतहटमा अपराध अनुसन्धान, फरार प्रतिवादी पक्राउ, सीमा क्षेत्रमा हुने तस्करी नियन्त्रण र ट्राफिक कारबाहीलाई प्राथमिकता दिइएको देखिन्छ। तर ८९ मुद्दा दर्ता हुनु, सामाजिक अपराधका मुद्दा तुलनात्मक रूपमा बढी देखिनु तथा एक महिनामै ६८ वटा सवारी दुर्घटना हुनुले अपराध नियन्त्रणसँगै सामाजिक सुरक्षा र सडक सुरक्षामा थप प्रभावकारी रणनीतिको आवश्यकता रहेको देखाउँछ।
प्रहरीको ठूलो जनशक्ति गस्ती, चेकिङ र पिकेटमा परिचालन भए पनि अपराध न्यूनीकरणको वास्तविक प्रभाव आगामी महिनाको तथ्यांक र घटनाको प्रवृत्तिले अझ स्पष्ट पार्नेछ।
