काठमाडौँ । सार्वजनिक सवारीसाधन प्रयोग गरी उपत्यकाबाट बाहिरिने यात्रुलाई दुःख हैरानी दिने कार्यमा संलग्न १० जना बिचौलियालाई प्रहरीले पक्राउ गरेको छ ।
काठमाडौं उपत्यका ट्राफिक प्रहरी कार्यालयबाट खटिएको टोलीले सार्वजनिक गुनासोका आधारमा काठमाडौँ महानगरपालिका–३२ अन्तर्गत कोटेश्वर-जडीबुटी क्षेत्रमा विशेष निगरानी गरेको थियो ।
अनुगमनका क्रममा काउन्टर सञ्चालक, सवारी चालक तथा सहचालकसँग सम्बन्धित केही व्यक्तिहरूले यात्रु तान्ने, यात्रुको झोला खोस्ने तथा अनावश्यक रूपमा दुःख हैरानी दिने गरेको फेला परेको प्रहरीले जनाएको छ ।
उक्त कार्यमा संलग्न १० जनालाई नियन्त्रणमा लिएर थप अनुसन्धान तथा आवश्यक कारबाहीका लागि जिल्ला प्रहरी परिसर काठमाडौं पठाइएको छ ।
पक्राउ पर्नेमा धनुषाका सूर्यबहादुर देवकोटा, दोलखाका प्रकाश शिवाकोटी, भक्तपुरका हरिभजन थापा, दोलखाका डिल्लीप्रसाद लामिछाने, सिन्धुपाल्चोकका सुरेश तामाङ, सिन्धुलीका तिलककुमार थापा, दोलखाका खड्कबहादुर तामाङ, सिन्धुलीका डोरकुमार श्रेष्ठ, ओखलढुंगाका नन्दलाल बुढाथोकी र सिन्धुपाल्चोकका राजेश सापकोटा रहेका छन् ।
प्रहरीले यात्रुलाई अनावश्यक दुःख दिने, जबर्जस्ती सवारीमा चढाउन खोज्ने तथा सामान खोस्ने जस्ता गतिविधिविरुद्ध निगरानी र कारबाहीलाई निरन्तरता दिइने जनाएको छ ।
