काठमाडौँ । जारी फिफा विश्वकप अन्तर्गत समुह जे को खेलमा आज राति अर्जेन्टिना र अस्ट्रिया आमने सामने हुने भएका छन् । अमेरिकाको डल्लास स्टेडियममा हुने यो खेल नेपाली समय अनुसार राति १०: ४५ बजेदेखि शुरु हुदैछ ।
यस खेलमा अर्जेन्टिनाका कप्तान लियोनेल मेसीले यस खेलमा ऐतिहासिक कीर्तिमान बनाउन सक्ने भएका छन्। अल्जेरियाविरुद्ध ३-० को जितमा ह्याट्रिक गर्दै करिअरको ६१औं ह्याट्रिक पूरा गरेका मेस्सी (क्लबका लागि ५० र अर्जेन्टिनाका लागि ११) अब विश्वकप इतिहासमा सर्वाधिक गोल गर्ने खेलाडी बन्न केवल एक गोल टाढा छन् । हाल यो कीर्तिमान मिरोस्लाभ क्लोस्सेसँग छ, जसले १६ गोल गरेका छन् ।
यदि मेसीले अस्ट्रियाविरुद्ध गोल गरे भने उनी लगातार ६ खेलमा गोल गर्ने विश्वकप इतिहासकै तेस्रो खेलाडी पनि बन्नेछन् । यसअघि फ्रान्सका जस्ट फोन्तेन र ब्राजिलका जायरजिन्होले एउटै संस्करणमा यो उपलब्धि हासिल गरेका थिए । मेसीको यो क्रम कतार विश्वकपमा अर्जेन्टिनाले जित हासिल गरेको समयदेखि सुरु भएको हो ।
यस खेलमा अर्जेन्टिनाले अस्ट्रियालाई हरायो र जोर्डन अल्जेरियासँग पराजित भए समूह विजेता बनेर अर्को चरणमा पुग्नेछ । अस्ट्रिया पनि जित निकाल्न सके समूह विजेता बन्न सक्ने अवस्थामा छ ।
अस्ट्रियाका युवा मिडफिल्डर पल वानरले अर्जेन्टिनालाई सम्मान गर्दै आफ्नो टोलीको क्षमता देखाउन तयार रहेको बताएका छन् । अस्ट्रियाले जोर्डनविरुद्ध ३-१ को जित निकाले पनि खेल प्रदर्शन भने पूर्ण सन्तोषजनक थिएन ।
अस्ट्रियाको जितमा रोमानो श्मिडको गोल बराबरी भएपछि ७६औं मिनेटमा आत्मघाती गोलबाट अग्रता लिएको थियो भने अन्त्यतिर मार्को आरनाउतोभिचले पेनाल्टीमार्फत गोल थपेका थिए ।
अस्ट्रिया पछिल्ला चार खेल लगातार जितिरहेको छ र पछिल्ला १२ खेलमध्ये १० जित, १ बराबरी र १ हारको अवस्थामा छ। तर विश्वकपमा लगातार दुई जित निकाल्ने अवसर भने उसले सन् १९८२ पछि पहिलो पटक पाउन सक्छ ।
टीममा डेभिड अलाबा, स्टेफान पोस्च र एलेसान्द्रो शोप्फको फिटनेसमा शंका छ । उनीहरू छुट्टै अभ्यास गरिरहेका छन् र अन्तिम निर्णय खेलअघि हुनेछ । मार्सेल सबित्जरले आफ्नो १००औं अन्तर्राष्ट्रिय खेल खेल्ने तयारीमा छन्। उनी अहिले देशका सर्वाधिक खेलाडी सूचीमा चौथो स्थानमा छन्।
अर्जेन्टिनाका प्रशिक्षक लियोनेल स्कालोनीले केही खेलाडी परिवर्तन गर्ने सम्भावना छ, जसमा नाहुएल मोलीनालाई सुरुवाती टोलीमा फर्काइने चर्चा छ ।
दुवै टोलीबीच अहिलेसम्म धेरै भेट भएको छैन । पछिल्लो भेट मैत्रीपूर्ण खेलमा ३६ वर्षअघि भएको थियो, जहाँ अर्जेन्टिना र अस्ट्रिया १-१ गोलको बराबरीमा रोकिएका थिए । सन् १९८० को भेटमा भने अर्जेन्टिनाले ५-१ को जित निकालेको थियो, जसमा डिएगो माराडोनाको अन्तर्राष्ट्रिय ह्याट्रिक पनि समावेश थियो ।
युरोपेली टोलीविरुद्ध अर्जेन्टिनाले पछिल्ला आठ विश्वकप समूह खेलमध्ये केवल एक खेल हारेको छ । अस्ट्रियाले भने दक्षिण अमेरिकी टोलीविरुद्ध ऐतिहासिक रूपमा धेरै संघर्ष गर्दै आएको छ ।
