नुवाकोट । भोटेकोसी हुँदै त्रिशूली नदीमा आएको बाढीबाट प्रभावित विदुर नगरपालिकामा हैजाको संक्रमण फैलिन नदिन हैजाविरुद्धको खोप अभियान सञ्चालन गरिएको छ ।
भदौ २५ गतेदेखि सुरु भएको खोप अभियान भदौ २९ गतेसम्म नगरपालिकाका सबै वडाका खोप केन्द्रबाट सञ्चालन हुनेछ । एक वर्ष उमेर पूरा भएका सबै बालबालिका तथा अन्य व्यक्तिले खोप लगाउन सक्नेछन् ।
बाढी प्रभावित क्षेत्रमा दूषित पानी तथा खानेकुराबाट हैजा फैलिन सक्ने जोखिम रहेकाले संक्रमण रोकथामका लागि खोप अभियान सञ्चालन गरिएको हो। अभियानमा नगरप्रमुख राजन श्रेष्ठसमेत सहभागी भएका छन् ।
नगरप्रमुख श्रेष्ठले हैजाको संक्रमणबाट जोगिन सबै नगरवासीलाई अभियानमा सहभागी भएर खोप लगाउन आग्रह गरेका छन् ।
