भारतमा थप ६१५ मेगावाट विद्युत बिक्री गर्न अनुमति, निर्यात स्वीकृति ११९८ मेगावाट पुग्यो

भ

काठमाडौं । नेपाल विद्युत् प्राधिकरणले भारतको ऊर्जा एक्सचेन्जमा थप ६१५.३४ मेगावाट विद्युत् बिक्री गर्न अनुमति पाएको छ ।

यसमध्ये मध्यकालीन विद्युत् बिक्री सम्झौताअन्तर्गतका आयोजनाबाट उत्पादित ५९४ मेगावाट र सेती खोला जलविद्युत् आयोजनाको २१.३४ मेगावाट विद्युत् बिक्री गर्न स्वीकृति प्राप्त भएको हो ।

भारतको केन्द्रीय विद्युत् प्राधिकरणले मंसिर २ गते ५९४ मेगावाट विद्युत् भारतीय ऊर्जा एक्सचेन्जको डे-अहेड तथा रियल टाइम बजारमा बिक्री गर्न अनुमति दिएको हो । उक्त विद्युत् सन् २०२६ नोभेम्बर १८ देखि २०२७ जुन १४ सम्म बिक्री गर्न सकिनेछ ।

अनुमतिप्राप्त विद्युत्मध्ये २०५ मेगावाट कटैया–कुशाहा, रामनगर–सुरजपुर र रक्सौल–परवानीपुर १३२ केभी प्रसारण लाइनमार्फत तथा ३८९ मेगावाट ढल्केबर–मुजफ्फरपुर ४०० केभी प्रसारण लाइनमार्फत निर्यात गरिनेछ । यो विद्युत् नेपाल विद्युत् प्राधिकरण र भारतका एनभीभीएन तथा पीटीसीबीच भएको मध्यकालीन बिक्री सम्झौताअन्तर्गतका आयोजनाबाट उत्पादन हुनेछ ।

त्यस्तै, सेती खोला जलविद्युत् आयोजनाबाट उत्पादित थप २१.३४ मेगावाट विद्युत् पनि नोभेम्बर १८ देखि सन् २०२७ अगस्ट ३१ सम्म भारतीय ऊर्जा एक्सचेन्जमा बिक्री गर्न अनुमति प्राप्त भएको छ । 

यससँगै भारततर्फ विद्युत् निर्यातका लागि स्वीकृत कुल परिमाण ११९८ मेगावाट पुगेको छ । प्राधिकरणले आगामी हिउँदयाममा विद्युत् माग व्यवस्थापनका लागि भारतबाट १००४ मेगावाट विद्युत् आयात गर्नसमेत अनुमति पाइसकेको जनाएको छ ।

About the author

Srijana Puri
By Srijana Puri
नेप प्रेस एक प्रमुख अनलाइन समाचार पोर्टल हो, जसले नेपालभित्रका र अन्तर्राष्ट्रिय खबरहरू छिटो, सटीक, र निष्पक्ष रूपमा सम्प्रेषण गर्ने उद्देश्य राख्छ। यो अनलाइन पत्रिका डिजिटल प्लेटफर्ममार्फत पाठकहरूलाई समाचार, विचार, विश्लेषण, मनोरञ्जन, खेलकुद, र जीवनशैलीसँग सम्बन्धित सामग्रीहरू प्रस्तुत गर्छ।