तिब्बत, १५ भदौ । दक्षिण(पश्चिम चीनको सिजाङ (तिब्बत) स्वायत्त क्षेत्रमा पर्ने गिरोङ बन्दरगाहमा गएको पहिरोमा परी मृत्यु हुनेको सङ्ख्या १६ पुगेको छ।
यतिवेला हजारौँ उद्धारकर्मीहरू हराइरहेका मानिसहरूको खोजीका लागि समयसँग प्रतिस्पर्धा गर्दै जुटिरहेका छन्। आइतबार गिरोङ काउन्टीमा आयोजित पत्रकार सम्मेलनमा दिइएको जानकारी अनुसार खोजी तथा उद्धार कार्यका लागि कुल २,१४१ जनशक्ति, २६९ वटा उद्धार सवारीसाधन र ३,९०० भन्दा बढी उपकरणहरू परिचालन गरिएको छ।
उद्धारकर्मीहरू स्थल, जल र हवाई मार्ग हुँदै विपद् प्रभावित मुख्य क्षेत्रतर्फ अघि बढिरहेका छन्। चीनसँगको सीमा क्षेत्रको नेपाली भू–भागमा आएको विपद्पछि अगस्ट २६ को बिहान गिरोङ बन्दरगाहमा पहिरो गएको थियो।
यस घटनामा १६ जनाको मृत्यु भएको छ भने आइतबार बिहानसम्म ५४६ जना हराइरहेका छन्। अधिकारीहरूले हराइरहेका व्यक्तिहरूको खोजीका लागि विभिन्न विभागहरूको सहभागितामा बृहत् अभियान सुरु गरिएको बताएका छन्।
पछिल्लो विवरणअनुसार नेपाल, भारत, संयुक्त राज्य अमेरिका, बेलायत, क्यानडा र अस्ट्रेलियालगायत २३ देशका २६१ विदेशी नागरिकहरू हराइरहेको पहिचान गरिएको छ।
चिनियाँ अधिकारीहरूले सम्बन्धित देशका दूतावास तथा वाणिज्य दूतावासहरूलाई यसबारे जानकारी गराइसकेका छन्। खोजी तथा जाँचका विभिन्न चरणहरू पूरा भएपछि हाल गिरोङ काउन्टीमा कुनै पनि विदेशी पर्यटक अलपत्र नपरेको अधिकारीहरूले बताएका छन्।
