काठमाडौँ । खाद्य व्यवस्था तथा व्यापार कम्पनी लिमिटेडको प्रमुख कार्यकारी अधिकृत पदमा नियुक्तिका लागि दरखास्त आह्वान गरिएको छ ।
उद्योग, वाणिज्य तथा आपूर्ति मन्त्रालयअन्तर्गत गठित सिफारिस समितिले रिक्त रहेको उक्त पदमा खुला प्रतिस्पर्धामार्फत नियुक्ति गर्न योग्य नेपाली नागरिकहरूबाट आवेदन माग गरेको हो ।
मन्त्रालयले सार्वजनिक निकायमा पदाधिकारी नियुक्ति तथा मनोनयनसम्बन्धी निर्देशिका, २०७८ अनुसार योग्यता पुगेका इच्छुक उम्मेदवारहरूलाई आवेदन दिन आग्रह गरेको छ ।
सूचनाअनुसार इच्छुक व्यक्तिहरूले सूचना प्रकाशित भएको मितिले २१ दिनभित्र कार्यालय समयमा मन्त्रालयको सरकारी उद्योग तथा संस्थान शाखा, सिंहदरबार, काठमाडौँमा दरखास्त बुझाउनुपर्नेछ ।
आवश्यक योग्यता, अनुभव तथा अन्य कागजातसम्बन्धी विस्तृत विवरण मन्त्रालयको आधिकारिक वेबसाइटमा उपलब्ध गराइएको छ ।
थप जानकारीका लागि मन्त्रालयको सरकारी उद्योग तथा संस्थान शाखामा रहेको फोन नम्बरमा सम्पर्क गर्न सकिने पनि सूचनामा उल्लेख गरिएको छ।
